Kópavogur og hvalveiðar

Heilsíðuauglýsing var í Fréttablaði og Morgunblaðinu þann 9. janúar undir yfirskriftinni Hefjum hvalveiðar. Undir hvatningarorðin skrifa fjölmargir aðilar og þar á meðal Kópavogsbær! Kópavogsbær hefur sem sagt tekið afstöðu til hvalveiða. Ég veit reyndar ekki til þess að hvalveiðar hafi verið stundaðar, né séu fyrirætlaðar frá Kópavogi, en það er aldrei að vita. Þá yrði nú líf og fjör á Kársnesinu!  

Ég er fulltrúi Samfylkingarinnar í umhverfisráði Kópavogs. Ráðið á að vera bæjarstjórn og bæjarráði ráðgefandi í öllum þeim málefnum sem tengjast náttúruvernd og umhverfismálum. Öll slík mál eiga því að fara fyrir ráðið. Ekki hafa hvalveiðar eða afstaða bæjarins til þeirra mála verið þar til umræðu.

Hefur þetta verið rætt í bæjarstjórn Kópavogs? Er þetta opinber stefna bæjarins og er Kópavogsbær aðili að Félagi áhugamanna um skynsamlega nýtingu náttúruauðlinda? Eða er þetta eins og með svo margt annað í Kópavogsbæ, ákvörðun eins manns tekin á ólýðræðislegan hátt?  

Ég vil fá svör við þessu. Hverjir eru það innan bæjarfélagsins, sem hafa tekið þessa afstöðu fyrir hönd bæjarbúa og ákveðið að auglýsa það með tilheyrandi tilkostnaði nú á tímum niðurskurðar?

 

Athugasemdir

[Gísli Baldvinsson (IP-tala skráð) 11.1.2009 kl. 14:49]

Hitt sveitarfélagið er Grímsey en mér sýnist hagsmuna þar vera að baki. En sumir í Kópavogi eiga í Hval h/f og þar liggja hagsmunirnir.

[Sigurður Haukur Gíslason, 11.1.2009 kl. 20:47]

Ekkert rósamál Gísli. Mundu að nú á allt að vera uppi á borðum. 

Hvaða "sumir" eiga í Hval h/f?

[Ingibjörg Hinriksdóttir, 15.1.2009 kl. 22:15]

Sæl, ég hef ætlað að blogga um þetta frá því ég sá auglýsinguna sl. föstudag, komst loksins í það í kvöld. Hjartanlega sammála þér. Undirritun á auglýsinguna er pólitísk yfirlýsing, slíkar yfirlýsingar ber að taka fyrir á réttum stöðum í stjórnsýslunni. Það hefur ekki verið gert enda hafa Kópavogsbúar engra hagsmuna að gæta gagnvart hvalveiðum. Undirritun hinna sveitarfélaganna sex er eðlileg þar sem sjómennska og fiskveiðar eru undirstaða þeirra samfélaga. Besti vinur aðal er náttúrulega mikill fylgismaður þess að hefja hvalveiðar og sjálfsagt hefur aðal ekki talið það eftir sér að styðja við vin sinn!